ஐபிஎல் 2020க்கும் கொரோனா தொற்று; ரசிகர்களுக்கு ஷாக் கொடுத்த கங்குலி!

0
64

ஐபிஎல் போட்டிகள் நடத்துவது தொடர்பாக ஐபிஎல் ஆட்சி மன்றக் குழுக் கூட்டம் மும்பையில் நடைபெற்றது. இதில் பிசிசிஐ நிர்வாகிகள், ஐபிஎல் அணி உரிமையாளர்கள், ஸ்டார் ஸ்போர்ட்ஸ் நிர்வாகிகளும் கலந்து கொண்டனர்.

உலகம் முழுவதும் கொரோனா பெரும் பாதிப்புக்களை ஏற்படுத்தி வருகிறது. இந்தியாவிலும் 80க்கும் மேற்பட்டவர்கள் கொரோனாவால் பாதிக்கப்பட்டுச் சிகிச்சை பெற்று வருகின்றனர். கொரோனா வைரஸ் பாதிப்பிற்கு இருவர் உயிரிழந்துள்ளனர். இதன் காரணமாக இந்தியாவில் பல்வேறு விளையாட்டுப் போட்டிகள் ஒத்தி வைக்கப்பட்டுள்ளன. வருகின்ற 29ஆம் தேதி தொடங்கவிருந்த ஐபிஎல் போட்டிகள் ஏப்ரல் 15ஆம் தேதிக்கு ஒத்தி வைக்கப்பட்டுள்ளது.

இந்நிலையில், நேற்று ஐபிஎல் ஆட்சி மன்றக் குழுக் கூட்டம் நடைபெற்றது. ஐபிஎல் போட்டிகளை நடத்துவது தொடர்பாக அணி உரிமையாளர்களிடம் பிசிசிஐ ஆலோசனை நடத்தியது.

இதில், இந்திய கிரிக்கெட் வாரியத் தலைவர் சவுரவ் கங்குலி, ஐபிஎல் தலைவர் பிரிஜேஷ் படேல், அணிகளின் உரிமையாளர்கள் ஷாருக்கான் (கொல்கத்தா நைட் ரைடர்ஸ்), நேஸ் வாடியா (கிங்ஸ் லெவன் பஞ்சாப்), ஆகாஷ் அம்பானி (மும்பை இந்தியன்ஸ்), பார்த் ஜிண்டால் (டெல்லி கேப்பிடல்ஸ்) உள்பட அனைத்து அணி உரிமையாளர்களும் கலந்து கொண்டனர்.

ஐபிஎல் ஒத்திவைப்பு: கங்குலி விளக்கம்!

கூட்டத்தில் 7 விதமாக முடிவுகள் எடுக்கப்பட்டு அது தொடர்பாக விவாதிக்கப்பட்டதாகத் தெரிவித்துள்ளனர். இதில் போட்டிகளின் எண்ணிக்கைகளைக் குறைப்பது, அணிகளை இரண்டு பிரிவுகளை மோதவிடுவது, அதில் முதல் நான்கு இடங்களைப் பிடிக்கும் அணிகளை ப்ளே ஆப் சுற்றில் விளையாட விடுவது, வார இறுதி நாட்களில் இரண்டிற்கும் அதிகமான ஆட்டங்களை நடத்துவது, 60 ஆட்டங்களையும் ரசிகர்கள் இல்லாமல் நடத்துவது தொடர்பாக ஆலோசனை நடத்தப்பட்டதாக நிர்வாகிகள் கூறியுள்ளனர்.

கூட்டம் முடிந்து செய்தியாளர்களைச் சந்தித்த பிசிசிஐ தலைவர் கங்குலி, ”போட்டிகளை எவ்வாறு நடத்துவது என்பது தொடர்பாக அணி உரிமையாளர்களிடம் கருத்துக் கேட்கப்பட்டது. கொரோனாவை கட்டுக்குள் வைப்பதற்கு மத்திய அரசு எடுக்கும் நடவடிக்கைகளுக்கு பிசிசிஐ முழு ஆதரவு அளிக்கும்.

2-3 வாரங்கள் பொறுத்திருந்து பின்பு, அடுத்தகட்ட முடிவுகள் எடுக்கப்படும். ஐபிஎல் போட்டிகளுக்கு ஏப்ரல் 15ஆம் தேதி வரை தடை விதிக்கப்பட்டுள்ளது. வெளிநாட்டு வீரர்கள் பங்கேற்பார்களா? என்பது பற்றி எனக்குத் தெரியாது.

சேப்பாக்கம்: கேலரி வந்தது, ஐபிஎல் வருமா?

போட்டிகள் நடைபெற்றால் சிறப்பாக இருக்கும், போட்டிகள் நடைபெறவில்லை என்றால் அதையும் நாம் ஏற்றுக்கொள்ளத் தான் வேண்டும். அணி உரிமையாளர்களுக்கோ, ஒளிபரப்பு உரிமம் பெற்ற ஸ்டார் ஸ்போர்ட்ஸ் நிறுவனத்திற்கோ இழப்பு ஏற்படுத்த நாங்கள் விரும்பவில்லை” என்று தெரிவித்தார்.

ஐபிஎல் போட்டிகள் நடைபெற்றாலும், முழுமையாக நடைபெறுமா என்கிற சந்தேகம் எழுந்துள்ளது. உலகக் கோப்பை டி20 போட்டிகள் வரவிருப்பதால் ஐபிஎல் போட்டிகளை மே 31ஆம் தேதிக்குள் முடித்தாக வேண்டிய கட்டாயத்தில் ஐபிஎல் நிர்வாகம் உள்ளது.

LEAVE A REPLY

Please enter your comment!
Please enter your name here