11.00 AM

கொரோனா தொற்றுக்கு உள்ளாகியுள்ள சந்தேகத்தின் பேரில் யாழ்ப்பாணம் போதனா வைத்தியசாலையில் தற்போது இருவர் சிகிச்சை பெற்று வருகின்றனர்.

இந்த தகவலை யாழ்ப்பாணம் போதனா வைத்தியசாலையின் பணிப்பாளர் டி. சத்தியமூர்த்தி இந்த தகவலை இன்று முற்பகல் வெளியிட்டுள்ளார்.

அத்துடன், இதுவரை கொரோனா தொற்று குறித்த சந்தேகத்தின் பேரில் 19 பேர் பரிசோதனை செய்து வெளியேறியுள்ளதாகவும் அவர் தெரிவித்துள்ளார்.

10.20 AM

2020ஆம் ஆண்டுக்கான டோக்கியோ ஒலிம்பிக் போட்டிகளுக்கு தமது விளையாட்டு வீரர்களை அனுப்பப்போவதில்லை என கனடா அறிவித்துள்ளது.

கனேடிய ஒலிம்பிக் சம்மேளனம் இந்த அறிவிப்பை வெளியிட்டுள்ளது.

அத்துடன், ஒலிம்பிக் போட்டிகளை ஒர வருடத்துக்கு ஒத்திவைக்குமாறும் கனேடிய ஒலிம்பிக் சம்மேளனத்தினால் சர்வதேச ஒலிம்பிக் சம்மேளனத்திடம் கோரிக்கை விடுக்கப்பட்டுள்ளது.

கொரோனா வைரஸ் தாக்கம் காரணமாகவே இந்த தீர்மானம் எடுக்கப்பட்டுள்ளதாக கனடா தெரிவித்துள்ளது.

விளையாட்டை விட மிக முக்கியமான சர்வதேச சுகாதார நெருக்கடியின் மத்தியில் உலகம் உள்ளதாக கனடா மேலும் சுட்டிக்காட்டியுள்ளது.

இதேவேளை, 2020ஆம் ஆண்டுக்கான டோக்கியோ ஒலிம்பிக் போட்டிகளை ஒத்திவைப்பதுதொடர்பில் ஆலோசித்துவருவதாக சர்வதேச ஒலிம்பிக் சம்மேளனம் நேற்று அறிவித்துள்ளது.

ஒலிம்பிக் போட்டிகளை முழுமையாக ரத்து செய்வது குறித்த எண்ணம்தமது திட்டமிடலில் இல்லை எனவும் போட்டிகளை ஒத்திவைப்பது குறித்து மாத்திரமே தாம் ஆலோசித்துவருவதாகவும் சர்வதேச ஒலிம்பிக் சம்மேளன நிறைவேற்றுக் குழு சுட்டிக்காட்டியுள்ளது.

இதன்படி, எதிர்வரும் நான்கு வாரங்களுக்குள் ஒலிம்பிக் போட்டிகளைஒத்திவைப்பது குறித்த தீர்மானம் வெளியிடப்படும் என அறிவிக்கப்பட்டுள்ளது.

09.50 AM

ஊரடங்கு சட்டம் தளர்த்தப்பட்டுள்ள பகுதிகளில் உள்ள அனைத்து வங்கிக் கிளைகளையும் திறந்து வைக்குமாறு, ஜனாதிபதியின் செயலாளர் வங்கி அதிகாரிகளை அறிவுறுத்தியுள்ளார்.

ஜனாதிபதியின் செயலாளர் பீ. பி. ஜயசுந்தர வங்கி சேவையாளர்கள் சங்கத்திடம் இந்த கோரிக்கையினை முன்வைத்துள்ளார்.

ஜனாதிபதி ஊடகப்பிரிவு வெளியிட்டுள்ள அறிக்கையில் இந்த விடயம் தெரிவிக்கப்பட்டுள்ளது.

இதேவேளை, வங்கி ஊழியர்கள் தங்களின் அலுவலக அடையாள அட்டையைினை ஊரடங்கு சட்ட அனுமதிப் பத்திரமாக பயன்படுத்த முடியும் என பதில் பொலிஸ் மா அதிபர் C.D. விக்ரமரட்ன தெரிவித்துள்ளார்.

நாட்டின் எட்டு மாவட்டங்கள் தவிர்ந்த ஏனைய பிரதேசங்களில் இன்று காலை 6 மணி முதல் ஊரடங்கு சட்டம் நீக்கப்பட்டுள்ளது.

கடந்த 20 ஆம் திகதி மாலை ஆறு மணி முதல் இன்று காலை 6 மணிவரை வரை அமுல்படுத்தப்பட்டிருந்த ஊரடங்கு சட்டம் கொழும்பு, கம்பஹா, புத்தளம், மன்னார், வவுனியா, முல்லைத்தீவு, கிளிநொச்சி மற்றும் யாழ்ப்பாணம் ஆகிய எட்டு மாவட்டங்கள் தவிர்ந்த ஏனைய மாவட்டங்களில் தளர்த்தப்பட்டுள்ளது.

இந்த நிலையில் இன்று காலை 6 மணிக்கு நீக்கப்பட்டுள்ள குறித்த ஊரடங்கு சட்டம் இன்று பிற்பகல் 2 மணி முதல் மீண்டும் அமுல்படுத்தப்படவுள்ளது.

அத்துடன், இந்த ஊரடங்கு சட்டமானது நாளை காலை 6 மணி வரை அமுலில் இருக்கும் எனவும் தெரிவிக்கப்பட்டுள்ளது.

இந்த நிலையில், குறித்த 8 மாவட்டங்களிலும் நாளை காலை 6 மணிக்கு நீக்கப்படவுள்ள ஊரடங்கு சட்டம் நாளை பிற்பகல் 2 மணி முதல் மறு அறிவித்தல் வரை மீண்டும் அமுல்படுத்தப்பட உள்ளமை குறிப்பிடத்தக்கது.

08.40 AM

கொரோனா வைரஸ் பரவல் அச்சுறுத்தல் காரணமாக கொலம்பியாவின் சிறைச்சாலை ஒன்றில் ஏற்பட்ட கலவரத்தில் 23 கைதிகள் உயிரிழந்துள்ளனர்.

கொலம்பியாவின் மிகப்பெரிய சிறைச்சாலைகளில் ஒன்றான பொகோட்டாஸ் சிறைச்சாலையில் நேற்று இந்த சம்பவம் இடம்பெற்றதாக கொலம்பிய நீதி அமைச்சர் மார்கரிட்டா தெரிவித்துள்ளார்.

இதேவேளை சம்பவத்தில் காயமடைந்த மேலும் 32 கைதிகள் உட்பட பாதுகாப்பு பணியாளர்கள் ஏழு பேர் சிகிச்சைகளுக்காக வைத்தியசாலையில் அனுமதிக்கப்பட்டுள்ளனர்.

இவர்களுள் இருவரின் நிலை கவலைக்கிடமாக உள்ளதென வைத்தியசாலை தகவல்கள் தெரிவிக்கின்றன.

08.20 AM

கொரோனா வைரஸ் பரவலை தடுக்கும் நோக்கில் இந்தியாவின் 80 நகரங்கள் இன்றுமுதல் மூடப்படவுள்ளன.

இந்தியாவின் தமிழகத்தில் உள்ள 3 மாவட்டங்கள் உட்பட 80 நகரங்களில் இன்று காலை 6 மணிமுதல் எதிர்வரும் 31 ஆம் திகதி வரை மூடப்படவுள்ளதாக இந்திய ஊடகங்கள் தெரிவிக்கின்றன.

இதேவேளை கொரோனா வைரஸ் பரவலை கட்டுப்படுத்துவதற்கான நடவடிக்கையின் ஒரு பகுதியாக பிரதமர் நரேந்திமோடியின் அழைப்பை ஏற்று, இந்தியா முழுவதும் நேற்று ஊரடங்கு சட்டம் அமுல்படுத்தப்பட்டது.

இந்த நிலையில், கொரோனா வைரஸ் பரவலை கட்டுப்படுத்தும் வகையில் தமிழகத்தில் உள்ள 3 மாவட்டங்கள் உள்பட இந்தியா முழுவதும் 80 மாவட்டங்களை தனிமைப் படுத்தி வைக்குமாறு மாநில அரசுகளுக்கு மத்திய அரசு ஆலோசனை வழங்கியுள்ளது.

75 மாவட்டங்களின் பட்டியலில் தமிழகத்தில் சென்னை, காஞ்சீபுரம், ஈரோடு ஆகிய 3 மாவட்டங்கள் இடம் பெற்றுள்ளதுடன் இந்த மாவட்டங்களில் அத்தியாவசிய சேவைகள் தவிர ஏனைய சேகைளும் அனைத்து சேவைகளும் முடக்கப்படவுள்ளதாக தெரிவிக்கப்பட்டுள்ளது.

அத்துடன் கேரளாவில் திருவனந்தபுரம், எர்ணாகுளம், இடுக்கி, கண்ணூர், காசர்கோடு, திருச்சூர் உள்ளிட்ட 10 மாவட்டங்களும், ஆந்திராவில் பிரகாசம், விஜயவாடா, விசாகப்பட்டினம் ஆகிய 3 மாவட்டங்களும், தெலுங்கானாவில் ஹைதராபாத், பத்ராத்ரி , மெட்சாய், ரெங்காரெட்டி, உள்ளிட்ட 5 மாவட்டங்களும் தனிமைப்படுத்தப்பட்டுள்ளன.

இதேவேளை கர்நாடகாவின் பெங்களுர் உள்ளிட்ட புறநகர், மங்களூர் உள்ளிட்ட 9 மாவட்டங்களில் எதிர்வரும் 31-ஆம் திகதி வரை மூடப்படவுள்ளமை குறிப்பிடத்தக்கது.

07.40 AM

ஊரடங்கு சட்டம் தளர்த்தப்படும் காலத்தில் மக்கள் பின்பற்ற வேண்டிய நடைமுறை குறித்து ஜனாதிபதி விசேட அறிவுறுத்தல்:

“தேவைகளுக்காக, வீட்டில் ஒருவர் மட்டுமே வெளியில் செல்லுங்கள்; செல்லும் போது முகக்கவசம் கட்டாயம் அணியுங்கள்; பொது இடங்களிலும் கடைகளிலும் அடுத்தவரில் இருந்து ஒரு மீட்டர் தூரம் பேணுங்கள்; உங்கள் முகத்தைத் தொடாதீர்கள்; கைகளை எப்போதும் நன்கு கழுவுங்கள், வீடு திரும்பியதும் குளியுங்கள்!”

07.15 AM

நாட்டில் ஊரடங்கு சட்டம் அமுல்படுத்தப்பட்ட காலப்பகுதியில் சட்டவிதிமுறைகளை மீறி செயற்பட்ட ஆயிரத்து 589 பேர் கைது செய்யப்பட்டுள்ளனர்.

கடந்த 20 ஆம் திகதி மாலை 6 மணிமுதல் நேற்று இரவு இரவு 10 மணிவரையான காலப்பகுதியில் இவர்கள் கைது செய்யப்பட்டதாக பொலிஸ் ஊடகப்பிரிவு தெரிவித்துள்ளது.

இதேவேளை கைது செய்யப்பட்டவர்கள் பயணித்த 362 வாகனங்கள் பொலிஸாரினால் கைப்பற்றப்பட்டுள்ளன.

ஊரடங்கு சட்டம் அமுல்படுத்தப்பட்ட காலப்பகுதியில் தேவையற்ற முறையில் வீதிகளில் நடமாடிய இவ்வாறு கைது செய்யப்பட்டதாக பொலிஸார் தெரிவித்துள்ளனர்.

இந்த நிலையில் இவ்வாறு கைது செய்யப்பட்டவர்கள் தொடர்பில் சட்ட நடவடிக்கை எடுக்கப்படவுள்ளதாக பொலிஸ் ஊடகப்பிரிவு வெளியிட்டுள்ள அறிக்கையில் மேலும் தெரிவிக்கப்பட்டுள்ளது.

07.00 AM

நாட்டில் கொரோனா தொற்றுக்கு உள்ளான நிலையில் சிகிச்சை பெறுவோரின் எண்ணிக்கை 86 ஆக அதிகரித்துள்ளது.

கொரோனா தொற்றுக்கு உள்ளாகிய மேலும் 5 பேர் புதிதாக கண்டறியப்பட்டுள்ளதாக சுகாதார அமைச்சின் தொற்று நோய் தடுப்புப் பிரிவு தெரிவித்துள்ளது.

இதன் அடிப்படையில் நேற்றைய தினமான 22ஆம் திகதி கொரோனா தொற்றுக்குள்ளான 9 பேர் வைத்திய பரிசோதனைகளின் மூலம் அடையாளம் காணப்பட்டுள்ளனர்.

மேலும், கொரோனா தொற்று சந்தேகத்தில் 15 வைத்தியசாலைகளில் 222 பேர் தங்கியிருந்து சிகிச்சை பெற்றுவருவதாகவும் தொற்று நோய் தடுப்புப் பிரிவு வெளியிட்டுள்ள அறிக்கையில் தெரிவிக்கப்பட்டுள்ளமை குறிப்பிடத்தக்கது.

LEAVE A REPLY

Please enter your comment!
Please enter your name here